શ્રીજીના બાળસ્વરૂપની ચાર પરિક્રમા દરમિયાન દેવકીજી મંદિરના સ્તંભ સાથે રથ અથડાવવાની પરંપરા

Author: નોબત સમાચાર

શ્રીજીના બાળસ્વરૂપની ચાર પરિક્રમા દરમિયાન દેવકીજી મંદિરના સ્તંભ સાથે રથ અથડાવવાની પરંપરા

દ્વારકાના જગતમંદિરમાં અષાઢી બીજ નિમિત્તે

દ્વારકા તા. ૧૫: દ્વારકાધીશ જગતમંદિરમાં આજે સાંજે ૫ થી ૭ સુધી પુષ્ય નક્ષત્ર અનુસાર રથયાત્રાના આયોજન હેઠળ શ્રીજીના બાળ સ્વરૂપને ચાંદીના રથમાં બેસાડીને દ્વારકાધીશ મંદિર પૂજારી પરિવાર દ્વારા દ્વારકાધીશના મુખ્ય ગર્ભગૃહને ફરતે ચાર વખત પરિક્રમા કરાવવામાં આવે છે. મંદિર પરિસરમાં પૂજારી પરિવાર દ્વારા આયોજિત રથયાત્રા મહોત્સવમાં હજારો ભાવિકો જોડાતા હોય છે.

દ્વારકાધીશ મંદિરના વારાદાર પૂજારી પ્રણવ રાજેન્દ્રભાઈ ઠાકર દ્વારા જણાવવામાં આવ્યું કે, દર વર્ષે અષાઢી બીજ નિમિત્તે પરંપરા મુજબ શ્રીજીના બાળ સ્વરૂપને ગર્ભગૃહમાંથી બહાર લાવીને ભકતો માટે દર્શન ખુલ્લાં મુકવામાં આવે છે. ભગવાન દ્વારકાધીશને બાળ સ્વરૂપે સફેદ ચાંદીના અશ્વો અને ચાંદીના રથમાં બેસાડીને શ્રીજીને મુખ્ય મંદિરની ફરતે ચાર વખત પરિક્રમા કરવામાં આવે છે. શ્રીજીની દરેક પરિક્રમા બાદ ભોગ અને આરતી પણ કરવામાં આવે છે. જે અનુસાર રથયાત્રા દરમ્યાન ઠાકોરજીના બાલસ્વરૂપની ચાર પરિક્રમા જગતમંદિર પરિસરમાં યોજવામાં આવશે. ભગવાન દ્વારકાધીશના બાળ સ્વરૂપની મુખ્ય મંદિરની ચોથી પરિક્રમા બાદ દ્વારકાધીશના મુખ્ય મંદિરની સામે આવેલાં માતા દેવકીજીના મંદિર પાસે આવેલા સ્તંભ સાથે અથડાવવામાં આવશે. લોકવાયકા મુજબ શ્રીજીના આ રથને આ સ્તંભ સાથે અથડાવાથી આકાશમાં વાદળો બંધાય છે અને દરેક જગ્યાએ સારો વરસાદ વરસે છે. સારા વરસાદથી ઉત્તમ પાક થતાં ખેડૂતો-લોકોના ઘર ધન-ધાન્યથી ભરાય છે તેવી માન્યતા છે.

જો આપને આ પોસ્ટ ગમી હોય તો શેર કરો...