Author: નોબત સમાચાર
મધ્યપ્રદેશના ઝાબુઆમાં ભયાનક અકસ્માત થતા એક જ પરિવારના ૯ સભ્યોના કરૂણ મૃત્યુ
ટ્રક સાથે ટકરાતા કારનો કચ્ચરઘાણઃ લગ્ન સમારોહમાંથી પરત ફરતી વખતે કાળ ભેટી ગયોઃ
ભોપાલ તા. ૪: મધ્યપ્રદેશના ઝાબુઆમાં ભયંકર અકસ્માત થયો છે, જેમાં ટ્રકની ટક્કરે કારનો કચ્ચરઘાણ નીકળી જતા એક જ પરિવારના ૯ ના મૃત્યુ થયા છે.
મધ્યપ્રદેશના ઝાબુઆ જિલ્લાના થાંદલા-મેઘનગર નજીક સંજેલી રેલવે ફાટક પાસે એક ભીષણ માર્ગ અકસ્માત સર્જાયો હતો. રાતે લગભગ ૩ વાગ્યે નિર્માણાધીન ઓવરબ્રીજ નજીક વળાંક પર જ્યારે ટ્રક વળી રહ્યો હતો તે સમયે જ કાર સાથે ભીષણ ટક્કર થતા કારનો કચ્ચરઘાણ થઈ ગયો હતો જેમાં કુલ ૯ લોકોના મૃત્યુના અહેવાલ મળ્યા છે.
પ્રાપ્ત થતી માહિતી અનુસાર મૃતકોમાં આઠ લોકો થાંદલાની નજીક આવેલા શિવગઢ મહુદાના વતની હતાં, જ્યારે અન્ય એક મૃતક વ્યક્તિ શિવગઢની નજીકના ગામડાનો રહેવાસી હતો. આ તમામ લોકો એક જ પરિવારના હોવાનો દાવો કરાયો છે.
ઘટનાની જાણ થતા જ પોલીસ ઘટના સ્થળે ધસી આવી હતી અને વધુ તપાસ હાથ ધરી હતી. માહિતી અનુસાર મૃતકોમાં એક જ પરિવારના ૯ લોકો સામેલ છે અને તેઓ કોઈ લગ્ન સમારોહમાં હાજરી આપીને ઘરે પાછા ફરી રહ્યા હતાં. આ દરમિયાન ભયંકર અકસ્માત સર્જાઈ ગયો હતો. ટક્કર એટલી ભયાનક હતી કે કારનો કચ્ચરઘાણ નીકળી ગયો હતો. મૃતકોમાં ર પુરુષ, ૩ મહિલાઓ અને ૪ બાળકો સામેલ છે.
આ ગમખ્વાર અકસ્માત સર્જી ટ્રકચાલક ઘટના સ્થળેથી ભાગી ગયો હતો. મૃતકોમાં મુકેશ ખાપેડ (ઉ.વ. ૪૦), તેની પત્ની સાવલી (ઉ.વ. ૩પ), પુત્ર વિનોદ (ઉ.વ. ૧૬), પુત્રી પાયલ (ઉ.વ. ૧ર), માધી બામણિયા (ઉ.વ. ૩૮), વિજય બામણિયા (ઉ.વ. ૧૪), કાંતા બામણિયા (ઉ.વ. ૧૪), રાગિણી બામણિયા (ઉ.વ. ૯) અને અકાલી પરમાર (ઉ.વ. ૩પ) નો સમાવેશ થાય છે, જ્યારે પાયલ પરમાર (ઉ.વ. ૧૯) અને પ વર્ષિય આશુ બામણિયાને ઈજા થઈ હતી અને તેમને હોસ્પિટલમાં રિફર કરવામાં આવ્યા હોવાનું જાણવા મળે છે.
ઝાબુઆના એસપી પદમ વિલોયન શુક્લાએ જણાવ્યું હતું કે, મેઘનગર નજીક સિમેન્ટથી ભરેલી ટ્રક પલટી ગઈ અને ઓમ્ની વાન પર પડી. આ અકસ્માતમાં ૯ લોકોના મોત થયા છે, જ્યારે બે ઘાયલ થયા છે. આ ઘટના મંગળવાર-બુધવાર રાત્રે લગભગ ૩ વાગ્યે બની હતી.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
