ચાર રાજ્યોના મુખ્યમંત્રીઓએ નીતિ આયોગની બેઠકનો કર્યો બહિષ્કારઃ કેન્દ્ર સામે માંડ્યો મોરચો

Author: નોબત સમાચાર

ચાર રાજ્યોના મુખ્યમંત્રીઓએ નીતિ આયોગની બેઠકનો કર્યો બહિષ્કારઃ કેન્દ્ર સામે માંડ્યો મોરચો

સત્તા સાચવવા ભેદભાવ રાખે છે મોદી સરકારઃ વિપક્ષ

નવી દિલ્હી તા. ર૪: બજેટ પછી ૪ રાજ્યોના મુખ્યમંત્રીઓએ કેન્દ્ર સરકાર સામે મોરચો ખોલ્યો છે અને નીતિ આયોગની બેઠકનો બહિષ્કાર કર્યો છે.

ગઈકાલે નાણાપ્રધાન નિર્મલા સીતારમણ દ્વારા રજૂ કરવામાં આવેલા કેન્દ્રિય બજેટમાં 'ભેદભાવ'ના વિરોધમાં કોંગ્રેસના ત્રણ સહિત ઓછામાં ઓછા ચાર મુખ્યપ્રધાનો ર૭ જુલાઈએ યોજાનારી નીતિ આયોગની બેઠકનો બહિષ્કાર કરવા જઈ રહ્યા છે.

તમિલનાડુના મુખ્યમંત્રી એમ.કે. સ્ટાલિને મંગળવારે સાંજે એક પ્રેસ કોન્ફરન્સમાં આની જાહેરાત કરી હતી, જ્યારે કોંગ્રેસના મહાસચિવ કે.સી. વેણુગોપાલે રાત્રે સોશિયલ મીડિયા પર એક પોસ્ટમાં લખ્યું હતું કે રજૂ કરવામાં આવેલ કેન્દ્રિય બજેટ અત્યંત ભેદભાવપૂર્ણ અને ખતરનાક છે, જે સંપૂર્ણપણે સંવાદ અને ન્યાયીપણાના સિદ્ધાંતોની વિરૂદ્ધ છે, જેનું કેન્દ્ર સરકારે પાલન કરવું જોઈએ. તેના વિરોધમાં કોંગ્રેસના મુખ્યમંત્રીઓ નીતિ આયોગની બેઠકનો બહિષ્કાર કરશે. આ સરકારનું વલણ સંપૂર્ણપણે બંધારણીય સિદ્ધાંતોની વિરૂદ્ધ છે. અમે એવી ઈવેન્ટમાં ભાગ લઈશું નહીં કે જે ફક્ત આ શાસનના સાચવવા, ભેદભાવપૂર્ણ પાસાઓને છૂપાવવા માટે રચાયેલ છે.

બહિષ્કાર કરાનારા કોંગ્રેસના મુખ્યમંત્રીઓમાં તેલંગણાના રેવંત રેડ્ડી, કર્ણાટકના સિદ્ધારમૈયા અને હિમાચલ પ્રદેશના સુખવિંદર સિંહ સુખુનો સમાવેશ થાય છે. સિદ્ધારમૈયાએ ઓનલાઈન પોસ્ટ કર્યું કે અમને નથી લાગતું કે કન્નડ લોકોનું સાંભળવામાં આવે છે. તેથી નીતિ આયોગની બેઠકમાં હાજરી આપવાનો કોઈ અર્થ નથી. અમે નીતિ આયોગની બેઠકનો બહિષ્કાર કરવાનો નિર્ણય લીધો છે, જે ર૭ જુલાઈએ વડાપ્રધાન નરેનદ્રભાઈ મોદીની અધ્યક્ષતામાં યોજાશે.

સિદ્ધારમૈયાએ કહ્યું કે કર્ણાટકની જરૂરિયાતો પર ચર્ચા કરવા માટે નવી દિલ્હીમાં સર્વપક્ષીય સાંસદોની બેઠક બોલાવવાના મારા નિષ્ઠાવાન પ્રયાસો છતાં કેન્દ્રિય બજેટ અમારા રાજ્યની માંગણીઓની અવગણના કરી છે. મેકેદાતુ અને મહદયીની મંજુરી માટેની અમારા ખેડૂતોની માંગણીઓને પણ અવગણવામાં આવી છે. અમારા રાજ્યને વિવિધ કેટેગરી હેઠળ મળતા ભંડોળમાં ઘટાડો કરવામાં આવ્યો હતો. મેટ્રો અને અન્ય ઈન્ફ્રા. પ્રોજેક્ટ્સ માટે ભંડોળ હજી દૂરનું સપનું છે. તેમણે કહ્યુંકે વડાપ્રધાને તેમની સરકાર બચાવવા માટે બજેટમાં આંધ્રપ્રદેશ અને બિહારથી આગળ જોયું નથી.

સ્ટાલિને કહ્યું કે તમિલનાડુને બજેટમાં સૌથી મોટો દગો મળ્યો છે. તેમણે કેન્દ્ર સરકારની નાણાકીય નીતિઓ અને ફાળવણીઓ પર ઊંડો અસંતોષ વ્યક્ત કર્યો. જેણે તમિલનાડુની જરૂરિયાતો અને માંગણીઓને સતત અવગણી છે. તેમણે આરોગ્ય, શિક્ષણ અને કૃષિ જેવા મહત્ત્વના ક્ષેત્રો માટે ફાળવણીમાં ઓછા વધારાને પણ પ્રકાશિત કર્યો અને રાજ્યની વર્તમાન જરૂરિયાતોને ધયાનમાં રાખીને ેને ચિંતાજનક ગણાવ્યું, તેમણે બેરોજગારી અને મોંઘવારી જેવા મહત્ત્વના મુદ્દાઓને સંબોધવામાં નિષ્ફળ રહેવા માટે બજેટની ટીકા કરી હતી, જે તેમણે કહ્ હતું કે સામાન્ય લોકોને ગંભીર અસર થઈ રહી છે.

જો આપને આ પોસ્ટ ગમી હોય તો શેર કરો...