ગુજરાતમાં ઠંડીનો પારો ગગડ્યોઃ આબુમાં ૧.૪ ડીગ્રીઃ નલિયામાં ૭ ડીગ્રી લઘુતમ તાપમાન

Author: નોબત સમાચાર

ગુજરાતમાં ઠંડીનો પારો ગગડ્યોઃ આબુમાં ૧.૪ ડીગ્રીઃ નલિયામાં ૭ ડીગ્રી લઘુતમ તાપમાન

કાશ્મીરમાં થયેલી ભારે હિમવર્ષાના કારણે

અમદાવાદ તા. ૧૧: હિમવર્ષાની અસર હેઠળ ગુજરાતમાં ઠંડી વધી છે. નલિયામાં સૌથી ઓછું ૭ ડીગ્રી તાપમાન નોંધાયું છે, જ્યારે માઉન્ટ આબુમાં પારો ૧.૪ ડીગ્રીએ પહોંચ્યો છે.

કાશ્મીરમાં થયેલી ભારે હિમવર્ષાના લીધે ગુજરાતમાં હવે ધીરે ધીરે ઠંડીનું જોર વધી રહ્યું છે અને અમદાવાદીઓ જે કડકડતી ઠંડીની આતુરતાથી રાહ જોઈ રહ્યા હતાં. તે ઠંડી હવે શરૂ થઈ છે. આજે અમદાવાદમાં સિઝનનું સૌથી ઓછું ૧ર ડીગ્રી લઘુતમ તાપમાન નોંધાયું હતું, જ્યારે માઉન્ટ આબુમાં ઠંડીનો પારો ગગડીને ૧.૪ ડીગ્રી સુધી પહોંચી ગયો હતો.

નલિયામાં પણ સિઝનનું સૌથી ઓછું ૭ ડીગ્રી તાપમાન નોંધાયું હતું. આ ઉપરાંત મંગળવારે ગુજરાતના ૧૦ થી વધુ શહેરોમાં ૧.પ ડીગ્રી ઓછું તાપમાન નોંધાયું હતું.

અમદાવાદમાં સોમવારથી શહેરીજનોને ફૂલગુલાબી ઠંડીનો અહેસાસ શરૂ થઈ ગયો છે અને આજે તાપમાન ઘટીને ૧ર ડીગ્રી નોંધાયું હતું. અમદાવાદમાં મંગળવારે લઘુતમ તાપમાન ૧ર ડીગ્રી અને મહત્તમ તાપમાન ર૯ ડીગ્રી નોંધાયું હતું.

નવેમ્બર પૂર થયા પછી ડિસેમ્બરમાં પણ લઘુતમ તાપમાન ર૦ ડીગરીથી ઉપર નોંધાયું હતું તેમજ દિવસે બપોરના સમયે શહેરીજનોને ગરમી-તાપનો અનુભવ થતો હતો, પરંતુ બે દિવસથી દિવસે પણ ઠંડા પવન સાથે વાતાવરણમાં ઠંડક પ્રસરી ગઈ છે અને દિવસ દરમિયાન આજે શહેરીજનોએ ઠંડીનો અનુભવ કર્યો હતો. અમદાવાદમાં આગામી ૩ દિવસ ૧૩ મી સુધી લઘુતમ તાપમાન ૧૪ ડીગ્રીની આસપાસ રહેવાની શક્યતા છે, જ્યારે ૧૪ મીથી ૧૬ મી સુધીમાં ૧પ ડીગ્રી તાપમાન રહેવાની શક્યતા છે.

મંગળવારે ગુજરાતમાં સૌથી ઓછું ૭ ડીગ્રી તાપમાન નલિયામાં નોંધાયું હતું. નલિયામાં પણ સિઝનનું સૌથી ઓછું તાપમાન આજે નોંધાયું હતું. ગુજરાતના અન્ય શહેરોની વાત કરીએ તો વડોદરામાં પણ ઠંડી વધતા મંગળવારે સૌથી ઓછું ૧૦ ડીગ્રી તાપમાન નોંધાયું હતું. જે પણ આ સિઝનમાં સૌથી ઓછું છે.

આ ઉપરાંત અમરેલીમાં ૧૩, ભાવનગરમાં ૧પ, ભૂજમાં ૧ર, દાહોદમાં ૧૪, ડીસામાં ૧૧, ગાંધીનગરમાં ૧૪, હિમ્મતનગરમાં ૧૩, રાજકોટમાં ૧ર અને સુરતમાં ૧પ ડીગ્રી અને જામનગર-દ્વારકામાં ૧૪ ડીગ્રી લઘુતમ તાપમાન નોંધાયું હતું, જ્યારે આ શહેરોમાં મહત્તમ તાપમાન ર૬ થી ર૯ ડીગ્રી આસપાસ રહ્યું છે. નલિયામાં ઠંડા પવનો સાથે કોલ્ડવેવની વોર્નિંગ પણ અપાઈ હતી, જ્યારે અમદાવાદમાં રાત્રિથી સવારના સમય સુધીમાં તાપમાન ઘટતા શહેરીજનો ઠંડીમાં ઠૂંઠવાયા હતાં.

હવામાન નિષ્ણાત અંબાલાલ પટેલના અનુસાર વેસ્ટર્ન ડિસ્ટર્બન્સની અસરના કારણે છેલ્લા કેટલાક દિવસથી ગુજરાતમાં ઠંડીનું જોર ઘટ્યું હતું, પરંતુ હાલામાં ઠંડીનો ચમકારો વર્તાઈ રહ્યો છે. આગામી દિવસોમાં રાજ્યના અનેક વિસ્તારોમાં કડકડતી ઠંડી પડી શકે છે.

આ ઉપરાંત બંગાળની ખાડીમાં લોકેશનને કારણે દક્ષિણ ગુજરાતના કેટલાક ભાગોમાં વાતાવરણમાં પલટો આવવાની સાથે હળવા વરસાદી ઝાપટા પડશે. જૂનાગઢ સહિત અન્ય દરિયાકાંઠા જિલ્લામાં તાપમાનમાં ઘટાડો થવાની શક્યતા છે તથા લઘુતમ તાપમાન ઘટના ઠંડી અનુભવાશે. તો બીજી તરફ હવામાન વિભાગ દ્વારા સૌરાષ્ટ્ર-કચ્છમાં કોલ્ડવેવની આશંકા વ્યક્ત કરવામાં આવી છે. સૌરાષ્ટ્ર-કચ્છમાં ફૂંકાતા ઠંડા પવનોના લીધે ઠંડીનો ચમકારો વધ્યો છે. આગામી સમયમાં હજુ તાપમાન નીચું જવાની શક્યતા છે.

જો આપને આ પોસ્ટ ગમી હોય તો શેર કરો...