દહેજ ઉત્પીડનનો કેસ લાંબો ચાલતા ભાંગી પડેલા પરિવારના યુવાને કર્યો આપઘાત

Author: નોબત સમાચાર

દહેજ ઉત્પીડનનો કેસ લાંબો ચાલતા ભાંગી પડેલા પરિવારના યુવાને કર્યો આપઘાત

'તારીખ પે તારીખ'ની સિસ્ટમ તથા પત્નીનો ત્રાસ જવાબદારઃ મૃતકનો દાવો

બેંગ્લુરૂ તા. ૧૧: બેંગ્લુરૂમાં એક યુવકે પોતાની પત્નીના તરાસ, જૂઠા કેસ અને કોર્ટમાં તારીખ પર તારીખથી કંટાળીને જીવન ટૂંકાવી દીધું હોવાની ઘટનાએ દેશભરમાં ચર્ચા જગાવી છે.

મહિલાઓ માટે બનાવવામાં આવેલા કાયદાનો દેશભરમાં થઈ રહ્યો છે. દુરૂપયોગ અને કોર્ટમાં લાંબા સમય સુધી ચાલી રહેલા કેસ તેમજ તારીખ પર તારીખવાળી સિસ્ટમ ખૂબ જ ચર્ચામાં છે, કારણ કે કાયદા અને વ્યવસ્થાની આ ખામીના કારણે એક યુવકે પોતાનો જીવ ગુમાવવો પડ્યો છે.

હકીકતમાં અતુલ સુભાષ નામના વ્યક્તિએ ૪૦ પાનાની સુસાઈડ નોટ લી પોતાનું જીવન ટૂંકાવી દીધું છે. જેનાથી તેની માનસિક પીડાનો અંદાજો લગાવી શકાય છે. યુવકે પોતાની પત્નીના ત્રાસ, જુઠા કેસ અને કોર્ટમાં તારીખ પર તારીખથી કંટાળીને જીવન ટૂંકાવી દીધું છે.

આ અંગેની વિસ્તૃત વિગતો એવી છે કે કર્ણાટકના બેંગ્લુરૂના રહેવાસી અતુલ સુભાષના લગ્ન ઉત્તરપ્રદેશના જૌનપુરની રહેવાસી નિકીતા સિંઘાનિયા સાથે થયા હતાં. અચાનક બેંગ્લુરૂથી પાછી જૌનપુર જતી રહી. તેણે પોતાના પતિ અતુલ અને સાસરિયાવાળાની સામે દહેજ ઉતપીડન અને ઘરેલું હિંસાનો કેસ કરી દીધો.

અતુલ સુભાષે પોતાની આત્મહત્યા પહેલા બનાવેલા વીડિયોમાં જણાવ્યું કે, મારી મોત માટે મારી પત્ની નિકીતા સિંઘાનિયા, સાસુ નિશા સિંઘાનિયા, સાળો અનુરાગ અને કાકાજી સસરા સુશિલ સિંઘાનિયા જવાબદાર છે. પૈસા પડવવા માટે મારી પત્ની અને સાસરિયાવાળાઓએ કાવતરૂ ઘડ્યું. તેના પરિવારે મને જુઠા કેસમાં ફસાવી દીધો. મારી અને મારા પરિવારની જિંદગી બરબાદ કરી દીધી છે.

પોતાના વીડિયોમાં અતુલે જણાવ્યું કે, અત્યાર સુધી ૧ર૦ કેસની તારીખ આપવામાં આવી છે અને ૪૦ વાર ખુદ હું બેંગ્લુરૂથી જૌનપુર જઈ આવ્યો છું. આ સિવાય મારા માતા-પિતા અને ભાઈને પણ કોર્ટના ધક્કા ખાવા પડી રહ્યા છે. આ વાત જાણીને નવાઈ લાગશે કે મોટાભાગની તારીખે તો કોર્ટમાં કંઈ થતું જ નથી. ક્યારેક ક્યારેક જજ નથી હોતા અને ક્યારેક હડતાલ હોય છે.

સુનાવણી દરમિયાન કોઈપણ પક્ષનો વકીલ આગળની તારીખની ડિમાન્ડ કરી શકે છે. મને વર્ષમાં ફક્ત ર૩ રજા જ મળે છે અને હવે હું આ સિસ્ટમથી થાકી ગયો છું. અતુલે સુસાઈડ નોટમાં લખ્યું કે, નિકીતા સિંઘાનિયાએ ૬ કેસ લોઅર કોર્ટ અને ત્રણ હાઈકોર્ટમાં કર્યા છે. નિકીતાએ તેના માતા-પિતા અને ભાઈ ઉપર હત્યા, હત્યાનો પ્રયાસ, અપ્રાકૃતિક સમાગમ, ઘરેલું હિંસા, દહેજ લેવાનો ખોટો આરોપ લગાવ્યો છે. આ આરોપોમાં એવી ધારાઓ છે, જેમાં જામીન મળવા પણ મુશ્કેલ છે.

પત્નીએ એક કેસમાં આરોપ લગાવ્યો કે, ર૦૧૯ માં મારા પરિવારે ૧૦ લાખ રૂપિયા દહેજ માંગ્યુ. આ ઝટકાથી તેના પિતાનું મોત થઈ ગયું. ક્રોસ એકઝામિનેશનમાં સાબિત થયું છે કે, નિકીતાના પિતાને હૃદયની બીમારી હતી અને તેના કારણે તેમનુ મોત થયું હતું. તેમની બીમારીમના કારણે જ અમારા લગ્નની પણ ઉતાવળ કરવામાં આવી હતી. વીડિયોમાં અતુલના દાવા અનુસાર ર૦રર માં નિકીતાએ અતુલના પરિવાર પર કેસ કરી દીધો હતો. મૃત્યુ પહેલા અતુલે પોતાના લગ્ન જીવન વિશે જણાવ્યું કે, મારી પત્ની શારીરિક સંતોષ માટે પણ વિચિત્ર માગ કરતી હતી. આ કારણે હું તેનાથી અંતર રાખતો. મારી પત્નીએ છૂટાછેડા બદલે દર મહિને બે લાખ રૂપિયાના ભરણપોષણની માંગ કરી. તેણે બાળકોને પણ દૂર રાખ્યા અને મને તેમને ક્યારેય મળવા પણ ન દીધો.

જૌનપુરની પ્રિન્સિપલ ફેમિલી કોર્ટના ન્યાયાધીશ પર આરોપ લગાવતા અતુલ કહ્યું કે, તેમની કોર્ટમાં તારીખ માટે કારકૂનને લાંચ આપવી પડતી હતી. ન્યાયધીશે મારા પર ત્રણ કરોડ રૂપિયાના ભરણપોષણનું દબાણ બનાવ્યું, સાથે જ ડિસેમ્બર ર૦ર૪ માં કેસ સેટલ કરવા માટે પાંચ લાખ રૂપિયા માંગ્યા જ્યારે મેં કહ્યું કે, મારી પત્ની મને આત્મહત્યા કરવા માટે ઉશ્કેરી રહી છે. ત્યારે ન્યાયાધીશ હસવા લાગ્યા. ર૦રર માં કારકૂને પહેલા ત્રણ લાખ રૂપિયા માંગ્યા હતાં, જ્યારે મેં લાંચ ન આપી તો ભરણોપોષણનો ઓર્ડર આપી દીધો, જેમાં દર મહિને ૮૦ હજાર રૂપિયા આપવાના હતાં. આ પ્રકારના આક્ષેપો કર્યા હોવાની ચર્ચા મીડિયામાં થઈ રહી છે, પરંતુ આ દાવાની હજુ પુષ્ટિ થઈ નથી.

અતુલે ન્યાયતંત્રને પોતાના માતા-પિતાને હેરાન ન કરવાની અપીલ કરી છે. પત્ની માટે છેલ્લો સંદેશો આપતા કહ્યું કે, મારા બાળકોને સારા સંસ્કાર સાથે ઉછેર થાય તે માટે મારા માતા-પિતાને આપી દે. મારા ભાઈને સૂચના આપુ છું કે, કેમેરા વિના મારી પત્ની અને સાસરીમાંથી કોઈને ન મળતો. મારી અસ્થિનું વિસર્જન ત્યારે જ કરજો જ્યારે હેરાન કરનારને સજા મળી જાય. જો ન્યાય ન મળે તો મારા મોત પછી મારી અસ્થિ કોર્ટની સામે ગટરમાં ફેંકી દેજો!

જો આપને આ પોસ્ટ ગમી હોય તો શેર કરો...