Author: નોબત સમાચાર
શિશાંગ ગામમાં મકાન બનાવી આપવાનું કહી બિલ્ડરે માર્યાે સત્તર લાખનો ધૂમ્બો
રાજકોટના વૃદ્ધને મધલાળ આપી છેતરી લેવાયાઃ
જામનગર તા. ૧: રાજકોટમાં રહેતા એક વૃદ્ધે પોતાની ફેક્ટરી વેચીને તેમાંથી ઉપજેલી રૂ. ૧૭ લાખની રકમ રાજકોટના એક બિલ્ડરને કાલાવડના શિશાંગ ગામમાં ફાર્મહાઉસ અને પાકુ મકાન બનાવી આપવા માટે સોંપ્યા પછી સાત વર્ષ સુધી બિલ્ડરે ગલ્લાતલ્લા કર્યા પછી તેણે અન્ય કેટલાક વ્યક્તિના પણ આવી જ રીતે ફૂલેકા ફેરવ્યા હોવાનંુ જાણવા મળતા આખરે આ વૃદ્ધે પોલીસમાં ફરિયાદ નોંધાવી છે. પોલીસે વિશ્વાસઘાત આચરવા અંગે બિલ્ડર સામે ગુન્હો નોંધી તપાસ આદરી છે.
રાજકોટના રૈયારોડ પર મંગલ પાર્ક સોસાયટીમાં ગંગોત્રી નામના મકાનમાં રહેતા હરીશભાઈ સોમનાથભાઈ પંડયા નામના પાંસઠ વર્ષના વૃદ્ધે કાલાવડ તાલુકાના શિશાંગ ગામમાં હોલીડે સિટીમાં ડ્રીમ લેન્ડ ફાર્મહાઉસ સ્થિત કલાસીકા રેસીડેન્સીનું નિર્માણ કરી રહેલા રાજકોટના રૈયા ટેલિફોન એક્સચેન્જ નજીક વસવાટ કરતા બિલ્ડર જીતેન્દ્ર કુંવરજીભાઈ મારૂનો વર્ષ ૨૦૧૬ના જુન મહિનામાં સંપર્ક કર્યાે હતો.
આ બિલ્ડર શિશાંગમાં ફાર્મ હાઉસ બનાવતા હોવાની જાણ થતાં હરીશભાઈએ તે માટે વાત કરી હતી. અગાઉ ફેક્ટરી ધરાવતા આ વૃદ્ધે પોતાની ફેકટરી બંધ કરી હતી તેના વેચાણમાંથી ઉપજેલી રૂ. ૧૭ લાખની રકમ ફાર્મહાઉસમાં રોકવા તૈયારી દર્શાવતા જીતેન્દ્રએ તેની સાથે સોદો કરી વર્ષ ૨૦૧૭ના એપ્રિલ મહિના સુધીમાં રૂ. ૧૭ લાખ રોકડે તથા ચેકથી મેળવ્યા હતા.
ત્યારપછી સાતેક વર્ષ વીતી ગયા હોવા છતાં બિલ્ડર જીતેન્દ્ર મારૂએ અગાઉ કહ્યા મુજબ ફાર્મ હાઉસ કે તેમાં પાકુ મકાન બનાવીને ન આપતા હરીશભાઈને છેતરાઈ ગયાનું જણાઈ આવ્યું હતું. તેઓએ તપાસ કરતા બિલ્ડરે શિશાંગમાં ફાર્મ હાઉસ તેમજ રેસીડેન્સી બનાવવાના બહાના તળે અન્ય કેટલાક વ્યક્તિઓ સાથે પણ છેતરપિંડી કરી હોવાનું જાણમાં આવ્યું હતું. તેથી ગઈકાલે હરીશભાઈએ કાલાવડ ગ્રામ્ય પોલીસ મથકમાં રાજકોટના બિલ્ડર જીતેન્દ્ર કુંવરજી મારૂ સામે પોતાના રૂ. ૧૭ લાખ ઓળવી જઈ વિશ્વાસઘાત આચરવા અંગે ફરિયાદ નોંધાવી છે. પોલીસે બિલ્ડર સામે આઈપીસીની કલમ ૪૦૬ હેઠળ ગુન્હો નોંધી તપાસ હાથ ધરી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
